O Cíes Market volve ameazar a pervivencia do Xardín histórico da Alameda

A pesar das reiteradas e fundamentadas denuncias da nosa Asociacion e de varios colectivos cidadáns, sobre a instalacion no Xardín histórico da Alameda de Vigo do falso mercado de Nadal chamado Cíes Market (realmente un negocio de explotación privada dun espazo público con mais de 100 casetas de comida rápida e bebidas alcohólicas), o Concello de Vigo permitiu iniciar nestes días, a instalación de estruturas no Xardín que anteceden á colocación das casetas. Nestes días volvimos a denunciar o grave incumprimento por parte do Concello e da Xunta de Galicia dos seus deberes de protección e conservación deste espazo urbano catalogado e enviamos protestas formais por inacción á Valedora da Cidadanía de Vigo e Valedora do Pobo de Galicia.

De seguido, facemos un texto de resume das nosas razóns recollidas nos varios escritos dirixidos ás administracions responsables:

INFORME DE SÍNTESE SOBRE O IMPACTO CRÍTICO DO USO COMERCIAL DA ALAMEDA DE VIGO PARA A PRESERVACIÓN DO XARDÍN HISTÓRICO:

O uso comercial intensivo ten un impacto significativamente negativo e prexudicial na conservación do arborado histórico catalogado, alterando os seus valores culturais, ambientais e a súa integridade física.

Este tipo de uso, exemplificado pola instalación anual de eventos como o "Cíes Market" na Alameda de Vigo (un xardín histórico catalogado), é considerado radicalmente incompatible cos valores que fundamentan a protección destes espazos.

Os principais impactos do uso comercial intensivo sobre o arborado e o xardín histórico inclúen:

1. Danos Físicos e Estruturais no Arborado e no Solo

O impacto máis grave e repetido é o dano físico e o deterioro das condicións de crecemento.

• Compactación do solo e danos radiculares: O tránsito constante de vehículos pesados e maquinaria durante os procesos de montaxe e desmontaxe, así como a afluencia masiva de persoas e a instalación de estruturas pesadas(como as 102 casetas comerciais do Cíes Market), provocan a compactación extrema do solo. A compactación do solo é un dos factores máis prexudiciais para o desenvolvemento radicular das árbores urbanas, xa que impide a absorción adecuada de auga e nutrientes, e reduce o osíxeno dispoñible no chan.

• Danos mecánicos directos: Prodúcense danos mecánicos nas raíces e nos troncos debido ao paso de vehículos pesados e á instalación de estruturas temporais/permanentes.

• Uso indebido das árbores: Utilízase o arborado como soporte para cables e luces. Por exemplo, instaláronse cables atados ao tronco de árbores monumentais e unha noria instalouse rozando as pólas dunha Casuarina (incluída no Catálogo de Árbores Senlleiras de Galicia).

2. Deterioro Fisiolóxico e Risco para a Seguridade

A alteración do medio físico e os danos causados directamente contribúen a un grave debilitamento da saúde do arborado.

• Estrés fisiolóxico e fitosanitario: O arborado presenta síntomas de estrés fisiolóxico (como perda prematura de follaxe e rexeneración deficiente) e problemas fitosanitarios graves, incluíndo a presenza de fungos patóxenos. O informe técnico do Areeiro confirmou un estado preocupante de deterioro, chegando a ser crítico en grandes exemplares da Alameda.

• Risco de seguridade: O debilitamento das árbores centenarias e a perda de vitalidade xeral (con numerosas pólas secas e debilitamento estrutural) aumentan o risco de desprendemento ou caída de exemplares, o que compromete a seguridade das persoas. A caída dun exemplar de Pittosporum undulatum centenario foi relacionada co impacto acumulado destas actividades.

• Alteración do hábitat: A contaminación lumínica (iluminación artificial masiva) e a contaminación acústica(megafonía) afectan negativamente a avifauna residente e o equilibrio ecolóxico do espazo. Ademais, a acumulación de residuos e os fumes do cociñado nas casetas contribúen á degradación.

3. Impacto na Integridade e Valores Culturais

O uso comercial intensivo e as prácticas de mantemento asociadas desvirtúan o carácter de monumento vivo que posúe un xardín histórico.

• Incompatibilidade de uso: O xardín histórico, que debe ser un lugar apracible que favoreza o contacto coa natureza, o silencio e a meditación, é transformado durante catro meses nun recinto comercial. O uso debe ser controlado en función da súa fraxilidade para preservar a súa esencia e mensaxe cultural. Os traballos de mantemento e conservación deben ter prioridade sobre as servidumes de utilización.

• Alteración da tipoloxía histórica: As intervencións ou a falta de reposición axeitada tras os danos alteran a tipoloxía e identidade histórica do espazo. Por exemplo, a substitución de árbores de gran porte (como un Pittosporum undulatum ou unha Washingtonia) por pequenas plantas "decorativas" non respecta os principios da Carta de Florencia, que esixe que a reposición de especies manteña a coherencia e estrutura histórica do espazo.

• Risco de degradación do patrimonio monumental: A conservación dun xardín histórico require un "perpetuo equilibrio" entre o movemento cíclico da natureza e a vontade artística. Un uso incompatible pon en perigo este equilibrio e a conservación do seu contorno apropiado.

4. Consecuencias da Mala Xestión

Ademais dos danos directos do uso comercial, o arborado catalogado é afectado por:

• Prácticas de poda inadecuadas: Obsérvanse podas severas e mutiladoras (como os terciados e desmochados) que alteran irreversiblemente a arquitectura das copas. Estas prácticas son anticientíficas e son contrarias á Ordenanza municipal, ao prego de condicións do contrato de mantemento e ao Estándar Europeo de Poda. As podas agresivas debilitan a árbore e fana máis susceptible a pragas e enfermidades.

• Falta de control e inacción administrativa: O Concello, como titular, é acusado de incumprir os seus deberes legais de conservación e de permitir que a contrata actúe sen control efectivo, obviando os informes técnicos que xa advertiran do impacto negativo destas actividades no xardín histórico catalogado.

• Incumprimento da normativa de patrimonio: A instalación de usos temporais (como o Cíes Market, que dura máis de 72 horas) en bens catalogados, como os xardíns históricos, require autorización previa da Consellería competente en materia de patrimonio cultural (Dirección Xeral de Patrimonio Cultural). A falta desta autorización é sinalada como unha infracción grave da Lei 5/2016 do Patrimonio Cultural de Galicia.

En resumo, o uso comercial intensivo sobre o arborado histórico catalogado tradúcese en danos irreversibles nas estruturas vexetais (raíces e troncos), debilitamento da vitalidade por compactación do solo e falta de coidados, riscos de seguridade pública e unha desnaturalización do carácter patrimonial do lugar, que perde a súa esencia como monumento vivo para converterse nun espazo de explotación lucrativa incompatible.

A Erythrina da rúa Pracer , xa ten luz propia. Simboliza a nosa loita contra a barbarie arboricida do cableado de Nadal.

Escrito enviado ao Rexistro xeral do Concello de Vigo

A Asociación Amigas das Árbores de Vigo, entidade sen ánimo de lucro e legalmente constituída para a defensa do patrimonio arbóreo e natural da cidade, diríxese a esta administración para denunciar a reiterada e consciente vulneración da Ordenanza Municipal de Zonas Verdes e Espazos Naturais pola colocación masiva de cableado e dispositivos luminosos sobre árbores urbanas.

No presente mes de agosto de 2025, a empresa Iluminaciones Ximénez, contratada polo Concello para a instalación da iluminación de Nadal, iniciou xa os traballos de colocación de cableado sobre diversos exemplares arbóreos, como parte da ornamentación anunciada recentemente polo Sr. Alcalde nos medios de comunicación, dando así inicio, de maneira anticipada e publicitada, ao denominado “Nadal vigués”.

En concreto, unha afiliada da nosa Asociación puido constatar que na rúa Pracer, os operarios da empresa estaban a colocar cableado sobre unha Erythrina crista-galli na rúa Pracer (árbore ornamental de gran valor paisaxístico e ecolóxico), ante o que manifestaron que “esa árbore levará cables, si ou si”, facendo caso omiso das advertencias relativas á ilegalidade da práctica¹.

Esta actuación vulnera o disposto no Artigo 16 da Ordenanza Municipal de Zonas Naturais e Espazos Verdes, que dispón de forma categórica que está prohibido o seguinte:

“Arrincar ou partir árbores, pelar ou arrincar as súas cortizas, cravar puntas, atar ás mesmas randeiras, escaleiras, ferramentas, soportes de andamiaxe, ciclomotores, bicicletas, carteis ou calquera outro elemento, gabear ou subir ás mesmas.”

Esta redacción non contempla ningunha excepción. Polo tanto, calquera colocación de elementos nas árbores é ilegal, con independencia de que estea avalada por un contrato municipal, por unha autorización interna ou por calquera outro tipo de acordo administrativo.

Ademais, como xa denunciamos nese Concello por escrito de novembro de 2024, estas intervencións preceden ou acompañan brutais podas realizadas pola empresa de mantemento Acciona, que mutilan severamente as copas das árbores para facilitar o traballo posterior de instalación da iluminación, alterando irreversiblemente a súa estrutura, saúde e función ecolóxica, como resultou evidente na “campaña” do Nadal de 2024, coa morte e grave debilitamento de centos de árbores que aínda hoxe amosan evidentes mostras dos danos que aquela actuación provocou en toda a cidade.

Estas prácticas, amplamente documentadas na tempada pasada, afectan a centos de exemplares e supoñen un atentado directo contra:

• O benestar do arborado urbano e a súa capacidade de supervivencia.

• Os compromisos ambientais do Concello en materia de biodiversidade urbana.

• A legalidade vixente municipal e contractual.

En consecuencia, 

SOLICITAMOS:

1. Que se ordene a inmediata paralización da colocación de elementos luminosos, guirnaldas ou cableado sobre o arborado urbano de Vigo, en cumprimento da Ordenanza Municipal de Zonas Verdes.

2. Que se prohiba expresamente no contrato vixente coa empresa Ximénez, ou en calquera contrato relacionado coa ornamentación urbana, o uso do arborado como soporte de iluminación ou outros elementos.

3. Que se realice unha auditoría independente sobre os efectos das podas realizadas nos últimos anos con motivo da campaña de Nadal e os danos acumulados no arborado urbano da cidade.

4. Que se nos responda por escrito a esta denuncia e se nos informe das medidas que o Concello prevé adoptar para garantir o cumprimento da normativa e a protección efectiva das árbores.

ADVERTIMOS:

Dado o carácter reiterado, sistemático e consciente destas actuacións, a nula resposta do Concello aos nosos escritos de advertencia, e oincumprimento da legalidade vixente por parte da propia administración local, esta Asociación:

• Estuda o inicio de accións legais, tanto administrativas como penais, por prevaricación ambiental, dano ao patrimonio público e vulneración das normativas de protección ambiental e contratación pública.

• Pon en coñecemento da cidadanía e da prensa estas prácticas, e iniciará unha campaña pública de denuncia se estas actuacións non son paralizadas e revertidas de inmediato.

Vigo non pode continuar sendo un escenario de destrución sistemática do seu arborado en nome do espectáculo. A saúde ambiental, o benestar común e o respecto ás leis están por riba do marketing.

Agradecendo de antemán a súa atención, e quedando á espera dunha resposta formal,

1 Esta árbore de gran valor paixasístico e ornamental, en perfecto estado de saúde e coa copa natural que non presentaba problema ningún, foi brutalmente mutilada e deformada en 2024 para “preparala” para a colocación de cableado e leds.

Deformación grave da copa da Erythrina como consecuencia da brutal poda de 2024 para colocarlle o cabled¡ado de Nadal nese ano. 

O Rally Rías Baixas "recupera" unha proba no Monte do Castro: que barbaridade é esta?

O RALLYE RÍAS BAIXAS 2025 CONVIRTE O MONTE DO CASTRO NUNHA PISTA DE CONTAMINACIÓN: A HIPOCRISÍA INSTITUCIONAL DESENMASCARADA 

En plena onda de calor, coa cidade promovendo políticas de baixas emisións e mobilidade sostible, resulta absolutamente inxustificable que se permita a entrada de ducias de vehículos de competición a escape libre nun dos poucos espazos naturais urbanos da cidade, con consecuencias graves para a fauna, o arborado histórico e a veciñanza.

Por que rexeitamos o tramo do Castro:

• O Monte do Castro, con 21 hectáreas de superficie e árbores centenarias, é recoñecido como unha zona de elevado valor ambiental, arqueolóxico e paisaxístico, sendo considerado a "única illa verde de suficiente tamaño" no centro urbano.

• O ruído e a contaminación producidos por coches de competición provocan un impacto directo sobre a avifauna urbana, especialmente en período de aniñamento, e xerarán estrés e abandono de niños.

• A actividade pon en risco o arborado e causa degradación do solo, compresión, erosión e danos mecánicos en zonas relevantes do parque.

• A iniciativa contravén o que se supón que debe ser un parque botánico e de lecer ambiental, transformándoo nun circuíto temporal de espectáculo e velocidad.

"Este espazo non é un circuíto deportivo. É un parque para as persoas, para a natureza e para a xente que busca sombra, silencio e aire limpo", recoñecen desde a Asociación.

- ¿Por qué se recupera este tramo despois de anos eliminado se sabemos que é un atentado ecolóxico? 

¿Como se xustifica que vehículos de combustión libre (moitos sen filtros antipartículas) rugan nunha zona declarada de interese natural e histórico?

Non é casualidade: é elección política. Permitir que o Rallye Rías Baixas arrase o Monte do Castro é unha mostra de cinismo institucional. Mentres cidades europeas pechan centros históricos a coches, Vigo regresa aos anos 70. Isto non é progreso: é barbarie ambiental disfrazada de espectáculo. 

Unha decisión que, en plena crise climática e promesas de "sostibilidade", expón a traxedia da desconexión política coa realidade ambiental de Vigo. 

Desde Amigas das Árbores esiximos aos organizadores, ao Concello de Vigo e aos patrocinadores públicos do evento, Deputación de Pontevedra e Xunta de Galicia:

1. Suspender de inmediato o tramo urbano no Monte do Castro, antes de que se produzan impactos irreparables.

2. Iniciar un proceso de revisión ambiental do uso de espazos públicos que impida actividades de motor neste tipo de parques urbanos.

3. Comprometerse públicamente a promover eventos compatibles coa conservación, como actividades de observación natural, pedagoxía ambiental ou lecer calmado, coherentes coas zonas de baixas emisións e co modelo de cidade saudable.

Remisión á Xunta de Galicia do Informe da Estación Fitopatolóxica do Areeiro sobre impactos no xardín histórico da Alameda de Vigo

A Asociación enviou o 25/06/2025 á Xunta de Galicia, tres solicitudes relacionadas co estado do Xardín histórico da Alameda

Documento 1: Remisión do informe da Estación Fitopatolóxica do Areeiro

Documento 2: Solicitude dun Plan de Restauración integral da Alameda

Documento 3: Solicitude de recuperación do grao de protección integral para a Alameda

Así mesmo enviou ao Concello de Vigo, escrito no mesmo sentido. Ver aquí.

DOCUMENTO 1: REMISIÓN DO INFORME DA ESTACIÓN FITOPATOLÓXICA DO AREEIRO SOBRE O ESTADO DO XARDÍN HISTORICO DA ALAMEDA

ANTECEDENTES

1. Con data de Rexistro 23/12/2024 desa Consellería, esta Asociación presentou (num 2024/3579978) un escrito no que se recollía o impacto do chamado Cíes Market sobre o xardín histórico da Alameda/Praza de Compostela de Vigo e se solicitaba o cumprimento das obrigas legais da Xunta de Galicia verbo da protección deste ben histórico e o exercizo da potestade de autorización para este tipo de uso intensivo dun espazo catalogado. Un uso que consideramos radicalmente incompatible cos valores que dan lugar á súa catalogación. Nese escrito citábanse os impactos críticos que ao noso xuízo se estaban a producir. Ese escrito, a data de hoxe, non tivo resposta ningunha por parte desa Admistración, obviando a obriga de respostar expresamente ás peticións da cidadanía. A ese escrito nos remitimos como antecedente num 1. do presente e damos por reproducido o seu contido.

2. Constatado a grave deterioro do Xardín da Praza de Compostela/Alameda¹, e ante a inacción das administracións competentes fronte a este feito, esta Asociación solicitou á Estación Fitopatolóxica do Areeiro --organismo técnico de referencia, dependente da Deputación Provincial de Pontevedra--, a realización dun estudo dalgunhas árbores na Alameda/Pza de Compostela, e nomeadamente sobre o impacto do chamado Cíes Market sobre este espazo. Petición que foi atendida e, en consecuencia, remitido o informe técnico de data 06/05/2025, que motiva este escrito e que se achega.

EXPOSICIÓN

Á vista destes antecedentes, desde a Asociación Amigas das Árbores de Vigo, dirixímonos a vostedes para trasladar o resultado do informe técnico emitido pola Estación Fitopatolóxica do Areeiro (Deputación de Pontevedra), en resposta á nosa solicitude de avaliación do estado fitosanitario do arborado da Alameda de Vigo. Este informe, centrado só no estado dalgunhas árbores significativas que representan unha mostra significativa do estado xeral deste Ben, pon de manifesto un grave deterioro do arborado deste xardín histórico, derivado non só do impacto directo do Cíes Market implantado polo Concello e xestionado en concesión de uso do espazo público pola Agrupación de Empresarios en la Organización de Eventos, Ferias y Mercados de la Comunidad de Madrid (AMFE), senón tamén pola actuación deficiente a cargo da contrata do Concello de Vigo para o mantemento deste espazo e a inacción por parte desa administración local.

1. Conclusións do Informe Técnico do Areeiro (Ref. Exp. 2025029075)

O informe conclúe, en síntese, que o arborado da Alameda presenta un estado preocupante de deterioro, chegando a ser crítico no caso de dous grandes exemplares, debido a:

• Compactación extrema do solo, como consecuencia, entre outras, das instalacións do Cíes Market, que impide a absorción adecuada de auga e nutrientes.

• Danos mecánicos nas raíces e nos troncos, provocados polo paso de vehículos pesados e a instalación de casetas e estruturas temporais/permanentes como as do Cíes Market.

• Problemas fitosanitarios graves, como a presenza de fungos patóxenos e outros axentes daniños.

• Alteración irreversible na arquitectura das copas, resultado de podas agresivas e deficientemente executadas.

• Perda de vitalidade xeral do arborado, con numerosas ponlas secas e debilitamento estrutural.

2. Malas prácticas de mantemento: incumprimento do contrato de Acciona.

O estado do arborado non é só consecuencia do impacto do Cíes Market, senón tamén do incumprimento reiterado do prego de condicións do contrato de mantemento de zonas verdes, adxudicado á empresa Acciona, e da falta de supervisión e control por parte do Concello de Vigo. Estas malas prácticas o impacto de actividades incompatibles coa saúde e conservación do arborado histórico, ten provocado un gravísimo deterioro especialmente nalgunhas das grandes árbores do xardín, ata o punto de que o informe da E.F. do Areeiro se indique a convenencia do apeo de dous grandes exemplares.

Entre as malas prácticas observadas destacan:

• Podas severas e mutiladoras, que contraveñen os principios do Estándar Europeo de Poda e as obrigas do prego de condicións.
• Uso de vehículos e maquinaria pesada no contorno do arborado.
• Falta de control fitosanitario preventivo, sen monitorización técnica do estado dos exemplares.
• Ausencia de medidas de conservación axeitadas, como a mellora do solo, descompactación e protección das raíces.
• Non reposición dos exemplares caídos con árbores de igual especie e porte, desvirtuando a identidade do xardín.
• Inacción do Concello, que permite que a contrata actúe sen control efectivo, converténdose así en actor e inductor necesario destas prácticas.

3. Un uso incompatible cos valores da Catalogación: O Cíes Market

A Alameda de Vigo é un xardín catalogado no PXOM e protexido pola normativa galega de patrimonio cultural. Porén, o seu uso como espazo para a celebración do “Cíes Market” e outras feiras é absolutamente incompatible coa conservación dos valores que motivaron a súa protección:

• A instalación de casetas, carpas, máquinas expendedoras e outros elementos de feira provoca compactación do solo e danos nas raíces, acelerando o deterioro do arborado.

• O paso de vehículos pesados e maquinaria durante meses (dende a data da montaxe ata a súa desmontaxe efectiva) xera compactación, vibracións e danos físicos nos exemplares.

• A exposición a luces, megafonía e afluencia masiva de persoas perturba o ecosistema e a saúde das árbores.

SOLICITA

Á vista dos resultados do informe técnico do Areeiro e das malas prácticas de mantemento constatadas e relacionadas no noso escrito de 23/12/2025 e corroboradas no informe do Areeiro, esiximos á Xunta de Galicia:

1. A esixencia ao Concello de Vigo por parte da Xunta de Galicia da precepetiva solicitude de autorización do uso deste espazo catalogado para a instalación do chamado Cíes Market e, á vista do contido deste escrito, e en aras á preservación deste espazo histórico e natural, a denegación da mesma por parte da Dirección xeral do Patrimonio Cultural.

2. A paralización definitiva da celebración do “Cíes Market” na Praza de Compostela/Alameda, así como doutras feiras ou eventos que impliquen compactación e impacto sobre o solo, o arborado e avifauna, buscando, se é o caso, ubicacións alternativas en espazos non vulnerables e con capacidade de acollida suficiente.

3. A esixencia ao Concello da execución inmediata das medidas preventivas e correctivas incluidas no informe da E.F do Areeiro citado.

4. Que a Xunta de Galicia, como organismo competente en materia de patrimonio cultural, asuma a súa responsabilidade de supervisión e control do cumprimento da normativa de protección deste xardín histórico.

Chamada final á responsabilidade institucional

A Alameda de Vigo non é só un espazo verde, é un patrimonio vivo da cidade, un símbolo histórico e ambiental que require protección e respecto. O informe do Areeiro e as evidencias recollidas demostran que o seu estado actual é consecuencia directa dunha sostida no tempo xestión deficiente e agresiva do Concello de Vigo, do seu uso impropio como lugar de feira e inaxeitado mantemento, conservación e restauración. É consecuencia tamén do incumprimento por parte da Administración autonómica do exercicio das súas competencias superiores de supervisión, autorización e inspección.

Agardamos unha resposta formal e inmediata da Xunta de Galicia, comprometéndose a adoptar as medidas necesarias para garantir a preservación e restauración deste espazo senlleiro.

Escrito en termos semellantes, acompañado de copia orixinal do informe citado da Estación Fitopatolóxica do Areeiro (Ref. Exp. 2025029075), remítese tamén, con esta mesma data, ao Concello de Vigo.

Ir a Documento 2 

Informe da Estación Fitopatolóxica do Areeiro sobre os impactos no Arborado do Xardín histórico da Praza de Compostela/Alameda de Vigo. 

1. Incluído no Catálogo de elementos do Patrimonio do vixente PXOM de Vigo (protexido xa dende o chamado Plan Especial de Elementos e Conxuntos a Conservar (PEEC) do ano 1986 e nos sucesivos plans urbanísticos)--

Esiximos a paralización da mutilación de arborado na rúa Pizarro, en pleno xuño e en tempo de nidificación

No día de hoxe enviamos ao Concello de VIgo, o seguinte escrito: 

A Asociación Amigas das Árbores de Vigo diríxese, unha vez máis, ao Concello para expresar a súa máis firme protesta e esixir a paralización inmediata da intervención que se está a realizar sobre o arborado urbano da rúa Pizarro, consistente en podas severas e drásticas que constitúen unha nova vulneración da normativa vixente e unha agresión ecolóxica sen xustificación técnica algunha.

Denunciamos que esta actuación:

1. Infrinxe a Ordenanza de Protección de Espazos Naturais e Zonas Verdes do Concello de Vigo, ao realizarse:

   • en época de máxima actividade vexetativa, con temperaturas extremas e plena formación da copa,

   • durante a tempada de nidificación de aves urbanas, vulnerando a normativa ambiental e o sentido común ecolóxico máis elemental.

2. Contravén as prescricións técnicas do contrato de mantemento de zonas verdes, actualmente adxudicado á empresa ACCIONA, cuxo prego especifica claramente os criterios técnicos e temporais para a poda, que neste caso están a ser vulnerados de xeito flagrante.

3. Viola os principios do Estándar Europeo de Poda (ETW), especialmente no relativo á conservación da estrutura natural da copa, á planificación en función da especie, idade e contorna, e á obrigatoriedade de minimizar o impacto fisiolóxico das intervencións.

4. Atenta contra a saúde pública, ao eliminar sombras vitais nun contexto de cambio climático e ondas de calor. As copas arbóreas son elementos esenciais de confort climático urbano e redución das temperaturas e da radiación.

5. Pode constituír unha infracción legal máis ampla, pois a reiteración destas prácticas podería dar lugar á responsabilidade do Concello por desatención sistemática das súas obrigas de control e supervisión da Contrata, así como por eventual delito ambiental ou prevaricación por omisión, segundo se determine en futuras accións legais que non descartamos impulsar.

Esta poda non é un feito illado, senón que se inscribe nunha campaña sistemática de mutilación do arborado urbano, tal como denunciamos xa formalmente no caso das rúas Marqués de Alcedo, Areal, Venezuela, Ecuador ou Teófilo Llorente. Tampouco é un erro puntual, senón unha práctica reiterada, tecnicamente inadmisible e lesiva para a cidade e o seu patrimonio verde.

EXIXIMOS:

• A paralización inmediata dos traballos na rúa Pizarro.

• A apertura dun expediente informativo urxente que determine as responsabilidades desta nova actuación ilegal.

• A comparecencia do servizo municipal correspondente, explicando os criterios técnicos (se os houbo) que avalan esta intervención.

• A depuración de responsabilidades, tanto na empresa concesionaria como nos servizos técnicos municipais que permiten ou avalan esta barbarie.

• A revisión integral do modelo de xestión do arborado urbano en Vigo, co acompañamento de persoal experto e con participación cidadá efectiva.

  
  
  
  
  
  
  
  

Advertimos novamente por escrito ao Concello de Vigo antes de que inicie mais mutilacións de arborado na rúa Ecuador

Desde a Asociación Amigas das Árbores de Vigo volvemos advertir ao Concello de Vigo, e en particular ao servizo municipal responsable do mantemento de zonas verdes, que temos constancia da disposición dunha plataforma elevadora na rúa Ecuador, previsiblemente para iniciar unha nova “campaña” de poda primaveral sobre o arborado urbano desa rúa.

Tendo en conta o que vimos de presenciar noutras rúas nas últimas semanas (Venezuela, Areal, Teófilo Llorente, Marqués de Alcedo…), tememos que se vaia repetir unha vez máis unha práctica sistemática de poda severa, anticientífica e mutiladora, totalmente incompatible cos principios básicos dunha arboricultura racional e sostible.

Queremos lembrar formalmente ao Concello de Vigo que a realización dunha poda severa nestas árbores, especialmente en plena primavera, suporía unha grave infracción por tripla vía:

1. Incumprimento da Ordenanza municipl de protección dos espazos naturais e zonas verdes, que prohibe expresamente as podas drásticas e mutiladoras e obriga a actuar segundo criterios técnicos axeitados.

2. Incumprimento do prego de prescricións técnicas do contrato de mantemento adxudicado a Acciona, que tamén establece claramente os criterios técnicos e a temporalización das intervencións, excluíndo podas agresivas e mutilacións como as que se están producindo.

3. Contravención directa do Estándar Europeo de Poda de Árbores, no que se sinala que:

   “As podas severas (como os desmochados e terciados) deben ser evitadas en todo caso, por afectar gravemente a saúde estrutural das árbores e a súa capacidade de realizar funcións ecolóxicas e de servizo urbano.”

Dado que o Concello é perfectamente coñecedor das advertencias e informes que esta Asociación leva presentado, tanto de maneira pública como formal, e tamén das numerosas referencias científicas, técnicas e normativas que lle foron achegadas, entendemos que calquera nova intervención como as xa documentadas podería implicar a responsabilidade directa dos servizos municipais e da empresa contratista, ao estarse producindo un reiterado e consciente incumprimento da legalidade vixente.

Por todo isto, exiximos a inmediata paralización de calquera intervención sobre o arborado da rúa Ecuador ata que se garanta por escrito que:

• Non se realizarán podas severas ou mutilacións.

• Calquera intervención responderá exclusivamente a criterios técnicos fundamentados e será executada por persoal cualificado.

• Se dará cumprimento estrito á normativa e ás obrigas recollidas no contrato vixente.

En caso contrario, a nosa asociación considerará xa a posibilidade de emprender accións legais por vulneración reiterada e consciente da normativa municipal e da “Lei do contrato” de mantemento de zonas verdes coa empresa Acciona, incluíndo a denuncia pública e ante os organismos competentes.

Sen outro particular, quedamos á espera de resposta urxente e con disposición para o diálogo, mais tamén con firmeza na defensa do noso arborado urbano.

Denunciamos de novo as mutilacións e podas severas no inicio desta primavera

ENÉSIMO ESCRITO ENVIADO AO CONCELLO DE VIGO 1/04/2025

Á atención da Concellería de Parques, Xardíns e Medio Natural do Concello de Vigo:

Desde a Asociación Amigas das Árbores de Vigo queremos trasladar, unha vez máis, a nosa máis enérxica protesta pola nova campaña de mutilacións e “podas” severas que se está a desenvolver en diferentes zonas da cidade, concretamente nas rúas Areal, Teófilo Llorente, Pracer, Tomás Alonso e na Finca de Mirambell en Canido (con brutal "terciado" do singular bosquete de Melaleucas), entre outras. As imaxes recollidas nas últimas xornadas mostran de novo prácticas claramente lesivas para o arborado urbano, realizadas en plena primavera, coincidindo co inicio do ciclo vexetativo das especies caducifolias.

As "podas" executadas constitúen verdadeiras mutilacións, sen criterio técnico coñecido, que afectan severamente á saúde estrutural e fisiolóxica das árbores.

Incumprimentos graves da normativa e do contrato

Estas actuacións contraveñen gravemente:

1. A Ordenanza municipal de espazos naturais e zonas verdes (art. 24), que prohibe expresamente mutilacións e desmochados do arborado urbano.

2. O Prego de condicións técnicas do contrato de mantemento de zonas verdes, vixente coa empresa Acciona, no que se especifica que as podas deben:

   • Ser realizadas por persoal especializado.

   • Responder a criterios técnicos e fitosanitarios xustificados.

   • Evitar podas drásticas, mutilacións ou cortes indiscriminados.

3. Os principios e criterios do Estándar Europeo de Poda de Árbores, que recollen que este tipo de cortes só están xustificados por razóns de seguridade documentadas e nunca deben realizarse de forma sistemática nin rutineira.

Consecuencias e preocupacións

Estas intervencións, como xa temos advertido en múltiples ocasións, conlevan:

• Un debilitamento estrutural progresivo das árbores afectadas.

• Un incremento do risco de enfermidades e pragas.

• Un deterioro irreversible da forma e estética dos exemplares.

• Un incremento da inseguridade futura por ramas mal formadas.

• Un atentado contra a biodiversidade urbana e a función ambiental do arborado.

Reclamacións urxentes

Á vista dos feitos e da reincidencia destas malas prácticas, esiximos:

1. A paralización inmediata da “campaña” de podas actualmente en marcha.

2. A realización dun informe técnico independente sobre os traballos realizados, que determine o seu grao de legalidade e adecuación técnica.

3. A revisión do contrato coa empresa concesionaria e a apertura dun expediente sancionador por vulneracións reiteradas do prego de condicións.

4. A implantación dun Protocolo público de boas prácticas en arborado urbano, baseado en criterios científicos e na participación cidadá.

5. A creación dun órgano consultivo independente, con participación da sociedade civil, para avaliar as intervencións no arborado.

Vigo merece un arborado urbano coidado, saudable e xestionado con responsabilidade. A destrución sistemática do noso patrimonio natural, especialmente en momentos tan críticos como o inicio da primavera, é inaceptable.

Á espera dunha resposta formal, reiteramos a nosa disposición ao diálogo, mais tamén a firmeza na denuncia social, mediática e xurídica desta situación.

Rúa Pracer

Finca de Mirambell

Rúa Teófilo Llorente

Areal

Rúa Pracer (en "proceso")