O eucalipto monumental do Nicolás Peña, mutilado, pero salvado da talla

Eran as 11:43 h deste venres 20 de decembro, cando nos chega o aviso dun veciño: están tallando o eucalipto monumental dos xardíns do Nicolás Peña!. A nova correu rápido polo chat de watshap de Amigas das árbores e se desprazaron ata alí os compañeiros e compañeiras que poideron. 

Cando chegou, primeiro, Xan, media hora despois do aviso, a grúa e as motoserras facían o seu tremendo traballo de desramado previo á talla que tiñan programada. A rápida acción do noso compañeiro logrou parar temporalmente a talla, ao advertir aos operarios da necesidade de permisos; chamou tamén á policía local e ao Seprona, logrando que se personasen tamén no lugar responsables de mantemento que afirmaron que executaban unha orde da xerencia do Hospital (hoxe dependente do SERGAS). Deulle tempo a documentar fotograficamente a operación e enviarnos as imaxes.

Con elas, demos rápido aviso dos feito en redes sociais e pouco despois achegáronse varias compañeiras máis, que serviron de reforzo para lograr disuadir á empresa que operaba contra a árbore. Non foron quen de parar a corta de grandes ponlas e dun inorme anaco da copa, pero lograron (esperemos que definitivamente) que pararan a prevista talla deste centenario exemplar.

Esta preciosa árbore queda agora ferida, danada, mutilada, pero será de mostra viva da ignorancia e estupidez de quen decidiu a talla e, sobre todo, mostra de que hai persoas que poñen os seus corpos fronte a barbarie e a favor do noso patrimonio contra os arboricidas. Grazas a todas as que participáchedes, ata onde foi humanamente posible, en parar esta defeita patrimonial.

Aportamos unha reportaxe fotográfica do exemplar antes, durante e despois da acción arboricida da xerencia do Nicolás Peña:

En 2011 (foto Javier G.)

En 2017 (Foto Javier G.)

2024 (Foto Javier G.)

As nosas Amigas das Árbores en acción. Grazas!

12/12/24 ... e chegamos nós a celebrar unha rúa verde salvada!

Petra Porter presentou o acto

O 12 de decembro de 2024, a Asociación Amigas das Árbores de Vigo celebramos o noso acto de presentación pública "oficial" na rúa María Berdiales, simbolicamente rebautizada como "María BerdeEs". Este lugar foi elixido pola súa carga histórica, xa que en 2018 a veciñanza conseguiu deter a tala das últimas árbores que quedaron neste tramo de rúa, despois de que o Concello eliminara, en obras de "humanización", todas as que conformaban a  preciosa cúpula vexetal nesta rúa, converténdose nun símbolo de loita colectiva en defensa do patrimonio natural urbano.

O evento, que comezou ás 19:30 horas, contou coa presenza dunhas duascentas persoas comprometidas coa conservación do medio ambiente en Vigo. A artista Petra Porter foi a encargada de conducir o acto. Tras unhas palabras de agradecemento, benvida e de reivindicación dunha cidade verde e viva, explicou o porqué da elección deste lugar para a nosa presentación dando paso logo á lectura do manifesto fundacional por parte do líder de Siniestro Total e veciño da Gran Vía, Julián Hernández.

Julián Hernández

Comezou Julián con palabras propias, denunciando a barbarie, citando as palabras que sobre as árbores e o maltrato á cidade pronunciaran os poetas Carlos Oroza ("Contemplo los árboles... porque los árboles son la hostia! "Un árbol es un alma que espera") e Manuel María Romón ("esta cidade ben merece un bombardeo"). No seu discurso, subliñou a importancia de preservar as zonas verdes e a biodiversidade urbana, facendo un chamamento á cidadanía para unirse na protección do patrimonio natural de Vigo. Rematou cun forte ALTRI NON!" que coreamos as persoas asistentes.

A continuación, entregáronse as distincións Viguesas Distintas á veciñanza de María Berdiales e ao alumnado da Falperra do Colexio Chans-Bembrive, en recoñecemento ás súas accións en defensa do arborado urbano, especialmente pola súa implicación na conservación das árbores de Romil.

Din Matamoro, diríxese ás asistentes en nome da
veciñanza de María Berdiales

Su Garrido cantando a capela

O acto continuou coa descuberta simbólica dunha placa que renomea a rúa como "María BerdeEs", en homenaxe á resistencia cidadá e ao compromiso coa natureza urbana. Este xesto representa a vontade de transformar Vigo nunha cidade máis verde e sostible, onde as árbores sexan valoradas e protexidas.

Rematamos coa lectura dun texto da nosa compañeira Raquel e co precioso tema de Su Garrido que, despois dunhas sentidas palabras en defensa da natureza e contra as agresións que está a sufrir o arborado en Vigo, cantou a capela con forza e pasión "A horta do Berbés".

A Asociación Amigas das Árbores de Vigo nace co obxectivo de defender e promover o coidado do arborado e da biodiversidade urbana, denunciando as agresións ao patrimonio natural e fomentando a implicación cidadá na súa conservación. O noso Manifesto fundacional está dispoñible en liña para quen desexe unirse a esta causa.

A prensa local fíxose eco do evento. La Voz de Galicia publicou unha nova destacando os detalles do acto e os obxectivos da asociación.

Pola súa banda, Atlántico Diario informou sobre a creación da asociación e a súa misión de coidar o "pulmón verde" de Vigo.

O dixital de A Movida colgou tamén en Instagram un completo fío con videos e imaxes do acto.

No min 2h15m deste programa da radio galega, poderás escoitar a entrevista que realizaron á nosa amiga Laura.

A presentación de Amigas das Árbores de Vigo marca o inicio dunha nova etapa na defensa activa do patrimonio natural da cidade, convidando a toda a cidadanía a participar e colaborar na protección das árbores e espazos verdes e na loita contra os que tallan e mutilan estes seres indispensables para a saúde e a vida.

María, Raquel, Teresa, Bea, Rafa e Laura,
responsables da produción do acto

Amigas das Árbores, presenta a Asociación nun acto público o 12/12/24 na rúa María Berdiales e convoca á cidadanía

ACTO PÚBLICO DE PRESENTACIÓN DA ASOCIACIÓN 
“AMIGAS DAS ÁRBORES DE VIGO”.
12 de decembro 2024, ás 19:30 horas.
Na rúa María BerdeEs (antes coñecida como María Berdiales),
na zona arborada entre Hernán Cortés e Gran Vía.

Con motivo da formalización da Asociación, as Amigas das Árbores de Vigo faremos un acto de presentación pública “oficial” o vindeiro día 12 de decembro´ás 19:30 horas, na rúa María Berdiales (na súa confluencia coa Gran Vía, no tramo arborado). A elección deste lugar quere simbolizar a loita da veciñanza pola preservación do patrimonio natural e a biodiversidade en Vigo, obxectivos fundacionais da nosa Asociación.

A elección deste lugar ten un forte sentido cívico e simbólico: no ano 2018, este tramo de rúa salvouse da tala municipal, pola acción da veciñanza, que durante días pendurou das árbores delicados carteis e cooridos e artísticos paxaros de cartón que esixían a conservación do arborado, impedindo así que ocorrese o que pasou no resto da rúa: o arrase do arborado adulto existente na primeira fase das obras de “humanización”.

O acto, que será presentado pola artista Petra Porter, comezará coa interpretación pola cantante Su Garrido Pombo, da peza “A horta do Berbés”, léndose seguidamente o Manifesto fudacional de Amigas, a cargo de Julián Hernández, líder de Siniestro Total, veciño deste Barrio de Casablanca.

Posteriormente, entregaranse dúas distincións especiais, que co nome de “Viguesas distintas” quere homenaxear a aquelas persoas e colectivos que se significan polo seu amor e defensa da natureza e do arborado urbano en Vigo. Neste ano serán dintinguidas a Veciñanza deste tramo de María Berdiales e a rapazada da Falperra do Colexio Público Chans-Bembrive que tivo unha actuación moi destacada na salvagarda do arborado desta zona fronte ás pretensións de tala do Concello de Vigo.

O acto rematará coa colocación por persoas da Asociación dunha placa coa nova denominación deste tramo de rúa: “Rúa de María BerdeEs”.

Anímate a compartir con nós este momento e a unirte a Amigas das Árbores na súa reivindicación dun Vigo realmente verde, no que as árbores non sexan talladas nin mutiladas, senon que sexan conservadas e coidadas, repectando a súa importantísima función ecolóxica e a súa imprescindible colaboración na saúde da poboación.

ANÍMATE A DIFUNDIR ESTA CONVOCATORIA E ACHÉGATE TAMÉN Á RÚA MARÍA BERDEES, COMPARTE O TEU AMOR POLO ARBORADO URBANO DE VIGO!

NON ÁS TALAS E ÁS MUTILACIÓNS DO NOSO PATRIMONIO ARBOREO!

DEFENDAMOS O NOSO PATRIMONIO NATURAL!

Asinas o noso Manifesto? Preme aquí

Amigas das Árbores esixe ao Concello que cesen as podas drásticas e a colocación de cables nas árbores

A Asociación Amigas das Árbores de Vigo presenta un escrito ao Concello esixindo o fin das podas drásticas e da instalación de luces decorativas nas árbores urbanas.

Vigo, 11 de novembro de 2024 – A Asociación Amigas das Árbores de Vigo presentou hoxe un escrito dirixido ao alcalde de Vigo, no que esixe a revisión e cesamento das prácticas de poda drástica e da colocación de cableado e iluminación decorativa sobre o arborado urbano. A asociación, que ten como obxectivo a protección e conservación do patrimonio arbóreo da cidade, expresa a súa profunda preocupación pola repetición de podas severas que afectan a vitalidade das árbores, así como pola colocación de luces e outros elementos decorativos que, segundo denuncian, vulneran a normativa municipal e comprometen a saúde e a integridade das árbores.

Segundo a Asociación Amigas das Árbores, estas prácticas non só infrinxen a Ordenanza de Zonas Verdes e Espazos Naturais de Vigo, que establece criterios de mínima intervención para a poda, senón que tamén incumpren o Prego de Condicións do contrato de mantemento das zonas verdes. No escrito, a asociación advirte que as podas severas alteran o crecemento natural das árbores, debilitándoas e facéndoas máis vulnerables a pragas e enfermidades. Pola súa parte, a instalación de luces nas copas impón tensións adicionais sobre as ramas e altera os ciclos biolóxicos das árbores, afectando tanto ao ecosistema urbano como á fauna local.

A asociación insta ao Concello a cesar estas prácticas e propón que busque alternativas de iluminación para o Nadal que non interfiran co arborado urbano, garantindo así un compromiso co medio ambiente e a biodiversidade na cidade. Escrito: 

Manifesto fundacional

Manifesto Fundacional da Asociación 

Amigas das Árbores de Vigo

Hoxe máis ca nunca, as árbores que habitan as nosas cidades son imprescindibles para garantir un futuro sostible e saudable. A urxencia climática e os desafíos ambientais aos que nos enfrontamos, fan da natureza urbana unha aliada vital para o benestar humano e para a conservación da biodiversidade. Porén, en Vigo estamos a ser testemuñas dunha vaga de destrución do noso patrimonio natural urbano: árbores adultas están sendo talladas sen razóns xustificadas, e o noso arborado urbano está a sufrir podas drásticas que comprometen a súa saúde e contribución ecolóxica e son maltratadas cada ano ao pendurarlles e amarrar nas súas ponlas cables e guirnaldas.

É por iso que nace a Asociación Amigas das Árbores, unha organización sen ánimo de lucro cuxo obxectivo primordial é defendermos e promovermos o coidado e conservación do arborado e da biodiversidade urbana. Fundámonos desde o convencemento de que as árbores non son só elementos decorativos na cidade, senón seres vivos imprescindibles que contribúen a mellorar a calidade do aire, a regular a temperatura, a proporcionar espazos de lecer, benestar e saúde, e a preservar a biodiversidade.

Como asociación, queremos: